Kemi të bëjmë me fortifikimin kryesor prehistorik në Shqipërinë e Mesme. Është monumenti më i rëndësishëm i arkitekturës ilire të periudhës së parë. Ndërtuar mbi një kodër konike, shkëmbinjtë e saj kufizojnë një pjerrësi që zbret nga maja në perëndim. Kalaja apo vendbanimi i rindërtuar mbi të është i antikitetit të vonë - mesjeta e hershme. Në listën e kështjellave të rindërtuara nga Justiniani, në provincën e Epirit të Ri, Prokopi përmend edhe një kështjellë të quajtur Tyrkanos, e identifikueshme me rrënojat e kalasë së Tujanit. Përballë me kalanë e Tujanit gjendet edhe kisha e Shën Marisë së Brarit dhe Varri Monumental i Skurajve, i shekujve X-XII e.s. Një tjetër element historik i rëndësishëm i zonës është edhe Ura e Brarit, në hyrje të fshatit Tujan dhe si pjesë e Rrugës së Arbrit, e cila që në lashtësi ka qenë rruga kryesore e vendit krahas rrugës Egnatia. Nëpër këtë rrugë strategjike lëvizte për shembull nga Kruja në Petralbë (Petrelë) Gjergj Kastrioti Skëndërbeu.